|
Ёзденланы Альберт - Чолпан. |
Хар башламны кёкюреги джаланды,
Джалан кибик башчы кеме джеллеге.
Ненча джангы мурат толмай къалгъанды,
Джеталмайын джан кюсеген белгиге?
Тыйгъыч болуб кюреширле, тохтар деб,
Зар джюрекле — тот киритле, сюнгюле...
Мен джангызма, итлик мени хорлар деб,
Эс ташлама муратынгдан тюнгюле,
Джел къалайгъа урса ары бюгюле!...
Сен бар алгъа, маскеле уа юрюрле!
Сау болмазлыкъ джара джауунг салмазча,
Сен кесинге кюбе ишле тёзюмден!
У у сёзлюге джууаб табмай къалмазча,
Окъ ишлей бил айтыр тюзлюк сёзюнгден!
Бир кёзюуге кюнню джабад булут да,
Азат джелле келиб аны чачхынчы.
Хайыр чыкъмаз гурушханы унут да,
Кюреш тюзлюк эшиклени ачхынчы!
Ашыкъ, тенгим, джашлыкъ сенден къачхынчы!
Ашыкъ, тенгим, саулукъ сенден къачхынчы!
1985 дж.
|