Ой долай, былай май долай,
Мен айтайым май долайны джомагъын.
Долайны да былайгъа урубуз,
Май гоппанлагъа турубуз.
Гоппан майла алыбыз,
Тамаданы аллына аны салыбыз.
Андан бизге къош-къош тигимле къабдырыр,
Айтханына чырдык-чырдык чабдырыр.
Айтханына чырдык-чырдык чабмасакъ,
Бутларыбызгъа сюйрю чыбыкъ тартдырыр,
Хайда, болаесенг бол, гыбыт.
Ичингдеги къара ийнекни джууурту,
Тышынгдагъы сары эчкини гыбыты
Хайда, болаесенг бол, гыбыт.
Болмасанг да сени бучхагъынгы кесерле,
Мени да къулагъымы кесерле,
Экисин да бир къаядан быргъарла.
Къошубуз да хан къонакъдан толгъанды,
Хайда, болаесенг бол, гыбыт.
Юй бийчебиз къушбаш эмеген,
Табханын кеси джемлеген.
Мен айтайым аман тиширыуну хапарын,
Отджагъада сабийини богъу болур.
Иги къатынны хапарын мен айтайым
Иги къатынны кюбюрюнде бёзю болур,
Ашхыла бла сёзю болур.
Аман кишини болушун мен айтайым,
Отджагъада кюлден чыкъмай олтуруучу болур,
Гырджынлада кёзю болур.
Иги кишини болушлусун мен айтайым,
Иги кишини ашхыла бла сёзю болур,
Тёнгертгеден уллу бау этер,
Аны ичи толу мал этер.
Ой долай, былай, былкъылай,
Туарларыбыз келелле черкес джылкъылай
Хайда, болаесенг, бол гыбыт,
Ичи сары майдан тол, гыбыт.