Биринчи юйюм, мени Ата Джуртум,
Сени сакъларгъа кетейим,
Машинада бара, фронтха джетгинчи,
Сеннге бир джырны этейим.

Ата джурт ючюн урушха кириб,
Тоблагъа окъла салырбыз,
Фашистле къачыб, биз аланы сюрюб,
Берлиннге дери барырбыз.

Биз джигит болуб, Джуртну сакъласакъ,
Ол ит фашистле кирмезле.
Къартны, сабийни эмда онгсузну
Ала джукъусун бёлмезле.

Джерибизге кирген къанлы джауланы
Энд джюреклерин джарабыз.
Грандтланы ёшюнюбюзге байлаб,
Танкалагъа къаршчы барабыз.

Совет танкала западха баралла,
Ала джерни, кёкню къаралтыб.
Коммунизма биз джол салабыз,
Къан ичген гыбыланы къоратыб.

Къутургъан бёрюча улусун Гитлер,
Ол уясындан кеталмай,
Джан берир кеси да бизни къолубуздан
Ол муратына джеталмай.

Къутургъан бёрюню илгиздик этдик,
Ол терен ташлы уядан.
Энд кишини къабыб, аурууун джукъдурмасын деб,
Аны тас этдик дуниядан.

Машинада этген джырымы
Энд джашауумда кёреме,
Уруш бошалды, ма биз хорладыкъ,
Анам, къууанч хапар береме.

Сюйген джырымы джырлайма, тенгле,
Сюйген танкама олтуруб.
Барлыкъма, анам, мен ёшюнюмю
Сыйлы орденледен толтуруб.

Ата Джуртуму джауладан сакълаб,
Къууанчым бла келеме.
Ичейим сени сууунгдан,
Къобан, Мен тансыкъ болуб ёлеме.