Орайда, атларына миннген эдиле нартла бирден, ашыгъып,
Орайда, узакъ жолгъа чыкъгъан эдиле, излей хайыр, ахшылыкъ.

Орайда, бек алларында баргъан къарт Дебетди быланы,
Орайда, къарт Дебетни уа бар эди онтогъуз уланы.

5 Орайда, нарт аскери Нарт уядан чаба, жорта кетдиле,
Орайда, кёп тауладан да, кёп сууладан да, уой, ётдюле.

Орайда, бара-жорта, жолда уа бир сейирден ёлдюле:
Орайда, бир жашчыкъ да бир бёрюню эме тургъанын кёрдюле.

Орайда, ол бёрю ычхыналмай бу жашчыкъны къолундан,
10 Орайда, нарт аскери тохтап къарайд бара тургъан жолундан.

— Орайда, жашчыкъ, кимсе, не адамса? — деп да соргъан эди нарт Дебет.
— Орайда, Ёрюзмекме, мен бир ёксюз ёсгенме.

Орайда, сабийликден бёрю сют а ичип ёсгенме,
Орайда, кийиклени, маралланы да къуууп, тутуп, жетип, кесгенме.

15 Орайда, атам кимди, анам кимди — танымайма, билмейме,
Орайда, жер-жерледе излейме да, адам халы кёрмейме.

Орайда, ол заманда айтхан эди нарт Дебет да, ашыгъа:
— Орайда, нарт атасы Дебет деген менме, — деген эди жашчыкъгъа, —

Орайда, барды мени онтогъуз а уланым, — деген эди, —
20 Орайда, жыйырманчылары болурса сен аланы, — деген эди.

Орайда, алай айтып, алып кетген эди ол Ёрюзмекни,
Орайда, болгъан эди ол а къартлыкъ жашы Дебетни.

Орайда, Ёрюзмек да болгъан эди нартла батыр уланы,
Орайда, кёп зулмудан, кёп палахдан къутхаргъан эд ол нартланы.