Ахшы къартла жау сюртелле мансларына,
Акъыл, адеп юйретелле жашларына,
Жаш къызчыкъла бау тагъалла чачларына,
Таулу къызла жау сюотелле къашларына,

Чачы жете болур, тейри, табанына,
Эр тапмайбыз биз къызланы аманына,
Къатынланы аманларын айтдырсагъыз,
Аланы да мен айтайым, тынгылагъыз.

Осал къатынны табаны жаркъма болур,
Чачы юйюгюр, къулакълары жатма болур.
Бухчакълары табанындан сюйрелирле,
Тюймелери къыйыкъ-мыйыкъ тюйрелирле.

Этек жайып, от жагъада ол олтурур,
От жагъаны хиппирикден ол толтурур.
Эри къызса, ата юйюне кете болур,
Этеклери чакъмакъ таууш эте болур.

Барыр, жаным, этеклерин сюйрегенлей,
Арпа унну гыржынлыкъгъа ийгенлей.
Аман къатынны баш ашы как болады,
Ахшы къатын къыш къатыкъгъа сакъ болады.

Къатын болса, юй жашаугъа къаты болсун,
Болмаса уа, жашар кюню алты болсун.
Къатын болса, юй тизгинни жыя билсин,
Шимир этмей, аш адырны жууа билсин.

Тёшеклери кюн къушлукъгъа жыйылырла,
Тауукълары тёшеклеге къуюлюрла,
Сабийлери болур тыкыраякъчыкъла,
Жаланбашла, къымыжа, къурум жыякъчыкъла.

Чийбел къатын бота чулгъар чий белине,
Чийсил гыржынны ол ашатыр эрине.
Къонакъ келсе, ол ачыудан къууурулур,
Эрни, бурну бир бирине жыйырылыр.

Толу юйню нюрюн алыр аман къатын,
Элде, кюлюп, сагъынырла аны атын.
Бошбел къатын, юлгю алып, иги болсун,
Ботаны атып, юйюне тири болсун.

Кязим аны ариу халын жыяргъа салыр,
Эрин, юйюн ариу тутса, бек къууаныр.
Алгъыш этип, айта турур аны атын,
Элин, жерин сыйлы этер аллай къатын!

(?)