Бизни Тохтар мал кютгенди Махарда
Сау бир джылны, энди малдан хайыр джокъ...
Къоюб келиб, джарашханды шахарда,
Аты — Тоха, юсю — импорт, къарны — токъ.

Бир кюн Тоха тюбегенди шахарда,
Школ заманда сюйюб тургъан къызына,
Кёрген кибик къызыл гюлню акъ къарда,
Сагъышында ол къайтханды ызына...

Агшын алыб, хапар сорду къызгъа ол,
Биргесине сабыр атлаб тебреди,
Айырылгъан джерге джете эки джол,
Гюлле сатхан къарт къатынны эследи.

Тири атлаб, къарт къатыннга ол келиб:
«Букетледен эм маджалын бер!» — деди,
Багъасындан хапар биле, ол кюлюб:
«Къатын, башынг болгъан болур сер?!» — деди.

Гюллерими къайтар! — деди къатынчыкъ,
Тынч бол! — деди, Тоха къарай ызына,
Къарт аммачыкъ болду хариб тып-тыншчыкъ,
Тоха ёхтем келди сюйген къызына.

«Къалмагъанды уятлары, бетлери,
Къоркъмасала иман джокъду бъшада!
Джасакъ сала, ачытмасанг этлерин,
Бюгюнлюкде джашау джокъду шахарда!» —

Дейди Тохтар, узатады гюллени.
Къыз алыргъа унамайын тебреди,
Кёргенинде ол ачыулу кёзлени,
Мыдах къарай: «Сау бол, Тохтар, бер...» — деди.

Тоха къызгъа бюсюреусюз ышара
Айтды: «Бюпон къарангыса, Аминат!
Башха болсанг, айтырымы джашыра
Турмаз эдим!.. Бол Аллахха аманат!..»

Гюллени да быргъай багуш гюрбеге,
Бек ашыгъыш сол джанына кетди ол.
Кёзлеринден джыламукъла тёгюле,
Аминат да онг джанына тутду джол.

1993 дж.