Сукълансакъ да игиге, андан юлгю алайыкъ,
Керти ашхы адамны саулугъунда махтайыкъ!
Бетсинебиз деб къоркъмай, атын джыргъа салайыкъ,
Кимди ол? — деб соргъаннга, аны атын айтайыкъ..
Ханапийди, Ханапий, Бытдаланы джашды ол!
Хар заманда кенг болсун, анга къууанч насыб джол!

Онглулагъа бетсинмей, тута билген тенгликни,
Тенгини халисинде кече билген кемликни,
Этмей уллу кёллюлюк, онгсузлагъа сый берген,
Къартны, джашны, сабийни къууанчларын бек керген!
Ханапийди, Ханапий, бизни Ханапийди ол!
Хар заманда кенг болсун ол атларыкъ насыб джол!

Бир-бирине кёлкъалды болгъанланы шох этген,
Тил этмеген кишиден, артындан сёз этмеген,
Зарланмагъан кишиге, таза кёллю халал джан,
Игиди! — деб айтады хар бир аны таныгъан!
Ханапийди, Ханапий, керти таулу джашды ол!
Хар заманда кенг болсун ол атларыкъ насыб джол!

Джарсыу кёрмей джашасын, адамлыгъы болуб баш!
Къарачайгъа туусунла Ханапийча джюз минг джаш!
Ёрюзмекча джаш болсун ол ёсдюрген джаш сабий,
Ма ол кюннге сау джетсин Бытдаланы Ханапий!
Джюз джыл толгъан кюнюне биз да эсен джетейик!
Амин Аллах! — деб айта, бюгюн къууанч этейик!

1996 дж.