«Джюрегинг бла къарамасанг джюрекге
Кёзлеринг бла кёрелмезсе»—деучененг.
Тюз болуренг. Бюгюн ушаб эрекге,
Табалмайма, сюймеклик къой, керти тенг.

Ким биледи... мен кесимча бир инсан,
Кишиге да джокъду дауум, терслигим,
Хазна киши этмесе да мени сан,
Мен этеме излегенин джюрегим.

Джюрегим а, джырла джаз—дейд,—таймаздан,
Джыр джазсам а, кёз аллымда — хаман сен.
Къачхы кече сарын этед талмаздан,
Олтурабыз ушакъ эте сен бла мен.

Къарамынг бла ушакъ этиб кечине,
Озадыла джашлыгъымы джыллары...
Эжиу эте къачхы джелли кечеге,
Согъадыла къобузуму къыллары.

«Джюрегинг бла къарамасанг джюрекге,
Кёзлеринг бла кёрелмезсе»—деучененг.
Тюз болуренг. Бюгюн ушаб эрекге,
Табалмайма, сюймеклик къой, керти тенг.

1979 дж.