Къышхы кече. Кёк чууакъды,
Джарытады толгъан ай.
Шошду шахар. Кеч болгъанды...
Биз барабыз ашыкъмай.

Анда-санда къатыбыз бла
Мешнала да ётелле,
Къобан сууну шош джырына
Дюрген эжиу этелле.

Бир кёзюуде аллыбыздан
Ачы аяз урады,
Терекледен юсюбюзге
Къар бурчакъла къуяды.

Ашыкъмайын келгенликге,
Арбазынга джетгенбиз...
Айырылыр заман джетди...
Бир аз ушакъ этгенбиз.

Кёзлериме къараб туруб,
Бир соруулу ышардынг,
Ашхы—дерик орнуна сен
Къучагъыма къысылдынг.

...Сюймеклигинг болмаз эди,
Сени меннге къысдыргъан?
Сууукъ кече болур эди
Сеннге алай буюргъан?

1975 дж.