Къабырда кибик турама кесим,
Кёлюм шошлукъдан толгъаиды,
Ийианмакълыгъы сай болгъан эсим
Ушакъ нёгерим болгъанды.

Хар аякъ таууш мени тиниме
Джити таш болуб тиеди,
Джаралы тиним къайтмаз юйюме
Ахыр саламын иеди.

Соруугъа алаб баргъанлай мени,
Сыртымдан шкок бла тюртелле.
Таза атымы, акъ иннетими
Къазан къара бла сюртелле.

Меннге айталла: «Джаууса халкъны!
Къагъытха къол сал, «хо» — де да!»
Бар эсе Аллах, бу мурдарланы
Кечиб къоялмаз кёрде да!

«Къол сал!» — деб, басыб чорт сындыргъалла
Бармакъларымы сегизин,
Къол салдырыргъа къоюб туралла,
Энди ол къалгъан экисин.

Танг белги бере, чыкъ! — деген буйрукъ
Тюрме шошлукъну джарады.
Джашасын Сталин! — деб айта биреу,
Ёлюмге кетиб барады.

Мен да тебресем ахыр джолума,
Ким билед, не деб айтырма?
Окъ тийгинчиге, сагъышларымда
Джарлы анама къайтырма.

1986 дж.