Сюйген къызым бирни сюйюб,
Менден кетсе ёмюрге,
Джазыкъсынма сен мени!
Термилсем да бишиб-кюйюб,
Кюреширме тёзерге,
Сакълай джазыу берирни.

Къартлыкъ келиб, ауруу эмиб,
Туралмасам орнумдан,
Джазыкъсынма сен мени!
Туудукъ-туугъан, тенгле келиб,
Сакълаб, кетмей къатымдан,
Кёлтюрюрле кёлюмю.

Джуртха чабхан джау итлени
Къыстай бара, мен ёлсем,
Джазыкъсынма сен мени!
Тута ёмюр адетлени,
Багъалата, тенглерим
Асырарла ёлюмю.

Къайтыр мадар бермей Джуртха,
Къаршчы чыгъыб къадарым,
Кийсем аны къарасын...
Джаш санларым ушаб къартха,
Ёлсем, джылар адамым
Болмай къалса, джазыкъсын.