«Алим» атны джюрютген,
Халкъгъа акъыл юретген,
Хар илмугъа байланнган,
Поэтме! — деб айланнган,
Татлы сёзлю, бездиргич —
Мудалиф Аминович!

Диннге аманны тёкген,
Берне, къалымны сёкген,
Кемлигибизге «кюйген»,
Кебинден гробну сюйген,
Къабырлада чагъыр ич: —
Мудалиф Аминович!

Джыйынлада къычыргъан,
Тепси тюбде мычыгъан, —
Орусчалаб сёлешген,
Джахилле бла ёчешген,
Буруудан чыкъгъан илкич —
Мудалиф Аминович!

Къызын ачхагъа сатхан,
Къалым ачхагъа батхан,
Бюгюн-бюгюче да сау,
Табмаймыд сени талау,
Айтчы, сен эсенг билгич,
Мудалиф Аминович?!

1979 дж.