Бизни тукъум тукъумладан аламат!
Бизни сыйлы кёрсюн саудан джамагъат!
Бизни тукъум тукъумладан залимди!
Аны билген джахил тюлдю, алимди!
Бизни джашла халекдиле джашладан,
Билеклери къатыдыла ташладан!
Бизни къызла къолгъа джетмей кетелле,
Кюеулени кютючюкле этелле!

Бизни байтал табыучанды эгизле!
Бизни къойла тонгузладан семизле!
Бизни атны тюе сюрюб джеталмаз!
Кюннге эки гаккы табад бизни къаз!
Бизни къораз къушладан да къоркъмайды!
Эшегибиз атдан аман джортмайды!
Бизни бабуш онглуракъды къазладан!
Ит орнубуз уллуракъды базладан!

Бизни парий киштиклени тутады!
Бизни киштик чачханланы джутады!
Къысхасыча айтсакъ, бизден залим джокъ!
Аны ючюнд джюрегибиз былай токъ!
Бизни тукъум хар заманда баш болсун!
Огъай •— деген, маймуллагъа аш болсун!
Ашауубуз болсун хаман джау бла бал!
Байрагъыбыз, тамгъабыз да - Мордамбал!
1997 дж.