Мени джазгъы тангым, ингил Мариям,
Кёз джарыгъым, дайым джашил дуниям!
Бюгюн сени кёрген болса уа Хайям, —
Хур къызладан кёлю чыгъыб барыред,
Эм ариуу джыр къаласыз къалыред,
Ёлюмсюзлюк сеннге башын салыред!

Огъай, къобуб келген болса уа Омар,
Ол бла манга дуния болур эди тар,
Анда сыйча, менде да ёхтемлик бар!
Бералмазем закийге да сени, бил,
Саулай дуния анга болса да ёкюл,
Этселе да отха салыб мени кюл!

Бир хыянат джетмез сеннге сауладан,
Ых-дегенни кёчюрлюкме тауладан,
Атламларым толсала да джауладан!
Анга бир да ишексиз бол, Мариям,
Заман джутмаз ол эсе да, ол — Хайям,
Андан онгсуз тюлме дерге уялмам:

Джылы сёзюнг джюрегими джъшытса,
Ингил бетинг тылпыуума сылатса,
Сакъларыкъма, деген сёзюнг джылатса!
Хайям алгъанд джюрегими тёзюмюн,
Бар, окъу! — дейд, кече къыссам кёзюмю.
Айт, Мариям, сакъларыкъма сёзюнгю!

1986 дж.