Бирде, сени заманынгы бек кюсей,
Бирде, мыдах бола келлик заманнга,
Бирде: «Сау къал, джууулмагъан Эресей!» —
Деб, кетерем десем да, джол джокъ манга.

Къайры баргъын? Эресейде — Къарачай,
Джерибизни сыртымамы саллыкъма?
Ана тилим, ата диним тургъанлай,
Башха тилми, башха динми аллыкъма?

Амалсыздан джырла джазыб, кёлюмю
Къандырсам да, къол джазмалай къалалла,
Уяталсам — деб, — джукълагъан тёлюмю,
Джыр джырласам, аягъымдан алалла.

«Кюйдюрелле, кюл этелле джырланы,
Джырлагъанла эжиусюзлей джырлайла,
Тюзлюк тилде джырлатмазгъа аланы,
Патчах итле мыйыланы къармайла» —

Деб келген да болур сени ангынга,
Сагъыш этиб, джашауунга къарасанг,
Ийнан, джырчы, къууаныренг халынга,
Бюгюнлюкде бир кесекге къобалсанг.

1982 дж.