Тенгим бла кюзде,
Нефтекум тюзде,
Абдул-Газыгъа келдим мен.
Таза кёлюмден,
Хурзук элимден
Элине салам бердим мен.

Хурзук элимде,
Ана тилимде
Сёлешгенимча сёлешсем,
Т ынгылайдыла,
Ангылайдыла,
Сары уа нексе, — дейле, — сен?

Хоу, сарыбашма,
Мен таулу джашма,
Къарачайлыма! — дейме мен.
Къарала — бары,
Мен а, бир сары...
Иннетибизди келишген.

Туркмен той этиб,
Бек эркелетиб,
Мени къонакъча кёрдюле.
Тепседим тойда,
Тартдым орайда...
Саугъагъа кёлек бердиле.

Тангнга чыкъгъанбыз,
Джолгъа чыкъгъанбыз,
Айыб этеме кесиме...
Мен тойда кёрген
Бир туркмен къызчыкъ
Келед да турад эсиме.

Джюрегим тарай,
Ызыма къарай,
Кетдим, къалыргъа джокъ амал.
Бу джылы юозде,
Нефтекум тюзде,
Абдул-Газы эл, эсен къал!

1972 дж.