Джай чиллени иссиси
Кюйдюреди бетинги,
Къумлу тюзню халиси
Шош этеди кёлюнгю.

Кёрюнмейди таудача
Кёб оюулу джашил хане,
Джокъду бизни элдеча
Бир сюйюмлю юй, арбаз.

Эшитилмейд тау сууча
Шоркъулдагъан берекет,
Джаусуз чархы арбаны
Сарнаб, бирде эшитилед.

Кёрюнмейди бир булут,
Кёлеккеге термилтед,
Бирде джел бла къум къобуб,
Кюнню бетин кюсетед.

Ол тюеде келген джаш,
Сукъланныкъ болур шохум,
Дуния билген шам Кавказ
Болгъанын билсе Джуртум?

Салам бериб, сорама:
«Къалай джашайсыз мунда,
Самаркъаугъа санама,
Не зат барды боз къумда?»

Тюесинден тющдю да,
Саламлашды ол джарыб,
Такъыясын тешди да,
Алай айтды ышарыб:

«Кюмюш башлы тауларынг
Болсала да аламат,
Меннге алтын къумларым
Ашхыдыла талай къат!»

1979 дж.