Уучу кибик, мени мараб мыдах сезим,
Деппанчыкъда олтурама джангыз кесим.

Джылтырайды кёл ёзенде, кюмюш кибик,
Чууакъ кёкден джерге тюшген юлюш кибик.
Кюнню алтын бармакълары таза кёлге
Къысылалла, дыгъы эте, джылыу тёге.
Субай таула ышаралла кёлге къараб,
Джашил къарта чепкенлерин аяз тараб.

Джырын джырлай джелчик келед кёлге джете,
Кюзгю кёлню сыйдам бетин «умур» эте.
Толкъунчукъла бир-бирлерин джеталмайла,
Джагъа тыя, кёлден чыгъыб кеталмайла,
Таш, къум джалаб ызларына къайтадыла,
Келгенлеге джангы хапар айтадыла.

Джайгъы кюнню джъшыуундан хауа эриб,
Кёлге саркъа, джагъаларын кенгнге кериб
Баргъан кибик, бу кёл манга джомакъ болуб,
Олтурама бу джомакъгъа къонакъ болуб.
Тазалыкъдан джылтырайды азгъын эсим.
Мараялмай, тюнгюлгенди мъщах сезим.

1983 дж.