Ёс, тайчыгъым, къанатлыча азат бол!
Джолда къартха, арыгъаннга къанат бол!
Джюгенингден чырт тутмасын зорлукъ къол,
Къой Джол болсун бирде сеннге чабар джол!

Ёс, тайчыгъым, дженгил ёс да кючден тол,
Ёсе кел да Гемудача тулпар бол!
Сеннге ат джер Минги Таудан этерме,
Айылынгы джанкъылычдан этерме!

Налынг тюшсе, мен айны нал этерме,
Нал чюйлени кюн таякъдан этерме!
Сени ичер сууунгу бал этерме,
Сеннге зынтхы джулдузладан этерме!

Джер-суу кёре, билим излей кетербиз,
Таудан, тюзден, тенгизледен ётербиз...
Джуртубузгъа тансыкъ болуб джетербиз,
Халкъыбызгъа игиликле этербиз!

1979 дж.