1.
Заман тартды эски джылда ахыр къылны,
Боран тилде ауаз берди сууукъ хауа.
Ал баласы, джан баласы Джангы джылны —
Башил айы чабыб джетди къучакъ джая.
Къар джауады джерге, кюмюш саугъа кибик,
Хар бурчакъгъа насыб сингиб джаугъан кибик.
Хей, Джангы джыл, къучакълайма алгъыш эте,
Сенн кёрмей кетгенлеге сагъыш эте.

2 .
Къышны кючю тёпорекге чачыла,
Аягъынгдан аягъы бла басады,
Бетинге да ийнелери чанчъша,
Буз къолу бла къолларынгдан къысады.
Кёзлеринге чырмау—кюмюш букъусу,
Тюшюрюрге излейд бузлу тузакъгъа.
Боран согъад, эрикдире къобузу,
Къысха джол да ушайд кемсиз узакъгъа.
3.
Суу джабалакъ себелейди, къаргъа кёче,
Мылы къар да сыртны, къолну сабыр акълай,
Къара кючюн тас этеди къара кече,
Юшюген джер арыгъанды, тангны сакълай.
Джаралы къыш джюрексиниб, къайыр бола,
Ингил джаз да, къышдан къоркъуб, сабыр бола,
Ахыр кере джарсыталла онгсуз джанны,
Атдырмайын дуниягъа джазгъы тангны.

4.
Къозу тишчик кибик ингил джанкъозчукъ
Ышыкъчыкъда къалгъан къарны тебере...
Къарынчыгъы тойгъан къара къозучукъ
Ойнайд азгъын анасы бла тёбеде.
Джангур джуугъан хауа кемсиз тазады.
Джазны джашил мерекебли къаламы,
Болгъан кибик къолчугъунда баланы,
Кюн бетлеге гяхиник тилде джазады.

5.
Кюн таякъла, кючлерине кемсиз база,
Деу тауланы акъ сыртларын къонгур эте,
Къарла эриб саркъадыла. Къобан— боза,
Алыб баргъан таш-агъачы дауур эте,
Хагок аяз, дауурладан къоркъуб, юрке,
Ёшюн уруш эте, элге барады терк.
Акъ гюллерин кёк хауагъа сабыр бюрке,
Джашил къарта чепкен киед алма терек.

6 .
Кюн тёгеди джерге эринчеклигин,
Теке къалкъыу этед бурма табигъат,
Джай бегитед джерде джашил чеклерин,
Хар бир джан да гюл ийисге табынад.
Кюн юреди от тылпыуун аламгъа,
Исси хауа къайнагъанча кёрюнед.
Суу джагъада терек салкъын адамгъа,
Суусаб кибик, кесин алай кюсетед.

7.
Къум бла зыгъыр къатыш джолу ёзенни
Джолоучуну тунчукъдурад букъудан,
Топракъ башлы, джашил чачлы юйлени
Уятады аяз ауур джукъдан.
Къара булут тау башына къабланад,
Къая джууаб беред элия джётелге,
Хар бир джан да суу тамчыгъа джутланад,
Кёб сакълатдынг, джайгъы джангур, джет элге!

8.
Джибек атлес джабылгъанчад чууакъ кёк,
Кюн да алтын кирпиклерин кергенди,
Заман тигед табигъатха тюлкю бёрк,
Джай а ахыр белгисине киргенди.
«Табигъатха сюйсенг махта, сюйсенг сёк
Мени»—деб, кюз джайгъа ёхтем къарайды.
Джайгъа ёкюл болгъанлыкъгъа чууакъ кёк,
Айбат кюз а табигъатны алдайды.

9.
Джарытса да тас этгенди кюн къарыуун,
Сууукъ аяз ёшюн урад къаялагъа,
Чегет тёгед джерге алтын джыламугъун,
Такъыр болуб кетген джашил дуниягъа.
Чегет сары, джангур сары, джел да сары,
Узакъ джолгъа атланнганча дуния саудан,
Турналаны мутхуз ючкюл джаулукълары,
«Сау къал» эте, ташаяды къарамымдан.

10.
Санчыкълары джалан болуб, кемсиз азыб,
Тал терекчик шууулдайды аяз тараб.
Буз къысхачла тёрт джанындан бирде къысыб,
Чокъуракъ суучукъ къалтырайды кёкге къараб.
Булутла уа тамгъаларын саладыла,
Омакъ кёкню мингджулдузлу кюйюзюне,
Бир-бирлери ёшюнлерин урадыла,
Эски айны голчу кюмюш мюйюзюне.

11.
Къулакъ суучукъ кибик болду ёхтем Къобан.
Санларына сууукъ чабхан джалан сабан
Ауругъанды, ахсыннганы— мутхуз тубан.
Къанатлыла кетгендиле къыбла таба,
Чыпчыкълагъа патчах болуб къара къаргъа,
Амалсыздан къулакъ тёзед къаргъа джыргъа.
Джауар къарны келечиси — къалын къырау,
Сууукълагъа тёз дей, этед джерге джарау.

12.
Буз кюбе бла джабылгъанча бютеу саны,
Кеси миниб тургъан кибик кюмюш атха,
«Тынгылачы, менме джъшны джюйюсханы!»—
Деб къычырад эндреуюк ай табигъатха.
Заман тартад эски джылда ахыр къылны,
Боран тилде ауаз беред сууукъ хауа.
Ал баласы, джан баласы Джангы джылны —
Башил айы джетерикди къучакъ джая.

1979 дж.