Кёлюмдеги джарсыуну
Билмей кимге айтыргъа,
Кёрюб болмай джашауну,
Тау элиме къайтыргъа
Тебрегенем ёмюрге,
Анда рахат ёлюрге...

Огъай, къызчыкъ, эринмей
Бир тынгыла сен манга:
Мен сахнада кёрюнмей,
Юрген итча тубаннга,
Къалай джашау этейим?
Джуртдан къайры кетейим?!

«Къралгъа джауса!»— деб, дауу
Барды бир тилчи зарны.
Менден а уллу джауу.
Болмагъаед бу къралны!
«Халкъланы тенг кёр!»—дейме,
Андан башха не дейме?!

«Энди, чыкъмаз китабынг,
Эшитилмезле джырларыиг,
Не джаны бла сен «дынг»
Болдунг! Тюрмед—къадарынг!
Сен сатлыкъса! Джойдунг бет!..»-
Дейди меннге бир уубет.

Къайтаралмай таб джууаб,
Мен къычырыб, хахайлаб,
Джюрексиннгенден джылаб,
Устазла уа, тынгылаб...
Атым чыгъыб телиге,
Кючден келгенем юйге.

Хауада къалыб ишим,
Тюнюм болгъанча тюшюм,
Тамам тутуб аманым,
Джер табмаем саныма,
Сенден къагъыт алгъаным,
Себеб болду джаныма!

Джанынга къор болайым!
Кетдн энди аманым...
Ойнай эсенг, ойнайым,
Барды ойнар заманым.
Керти айтсанг, сау бол сен!
Джаша джюз джыл сау-эсен!

Къозуй эсенг да мени,
Танымасам да сени,
Бу буз болгъан джюрекни
Эриталгъан мёлекни
Сюйсем, кёлюм болур токъ!
Сюер адамым да джокъ...

Бир затланы сандырай,
Бирде кюзгюге къарай,
Чач кибигими тарай,
Къагъытынгы къучакълай,
Уллу къууанчдан толдум,
Эм насыблы мен болдум!

Къаб башымы къазайым,
Сеннге джууаб джазайым:
Къызчыкъ, джаным, акъыллы,
Сюймеклигинги аллы
Огъур бла башлансын!
Индий киногъа ушасын!

Тенг къызчыгъынг таш салсын,
Къууанч хапарла айтсын,—
«Ол да сени сюед», —деб,
«Сагъыш этед, кюед»—деб,
«Кюнден—кюннге азад»—деб,
«Сеннге письмо джазад»—деб.

Ийнан сен тенг къызынга,
Шагъат болурма анга!
Быллай кюнюмде сюйген,
Мени къадарымса сен!
Кетсин джерден кюймеклик!
Нюр джашнасын сюймеклик!

Кертиликге къайтайым,
Энди тюзюн айтайым:
Сау бол джазгъан письмонга,
Бек разыма мен анга!
Керти сюе эсенг сен,
Сюер адам тюлме мен...

Халкъ билгенликге мени,
Бир кюн бир а тюрмени
Къурч эшиги ызымдан
Къайтарылса, мен андан
Чыгъармамы сау-эсен?
Сакълаб туралмазса сен.

Тюшмесем да тюрмеге,
Чыгъалмазма мен тёрге.
Болалмагъан тенг малгъа,
Керек тюлдю бу къралгъа!
Джуртну къоюб кеталмам,
Сени юй—кюн эталмам...

Джюрегинг бла аны сез,
Джангылсанг да ма бу джол,
Меничагъа бёлме эс.
Къагъытынга бек сау бол!
Къыйын кюнде болушдунг,
Джюрегиме кюч къошдунг!

1982 дж.