Салам, Мариям, мени джарыкъ джулдузум!
Бюгечели боран согъад къобузун.
Сеннге джетиб къайтыр эдим, джол узун...
Кесим мында, сагъышларым Кавказда,
Эсим турад сен чыгъыучу арбазда,
Итигиз да чабад манга талмаздан.

Марий, сени кёралмайма борандан,
Атанг чыкъса, бек къоркъама мен андан,
Къоркъгъан кибик сабийликде Къурандан.
Къалайд — дейсе, Марий, — ара шахарда?
Тюшде кибик сейирд мында джашаргъа,
Ушамайды Тебердиге, Марагъа,..

Мындад къралны болгъан закий баласы.
Москва шахар, халкъ айтыудан, эм азы —
Тин байлыкъны оюлмазлыкъ къаласы!
Тюзюн айтсам, меничала тюлле аз,
Бирн сёз бла къагъад къуджур дауурбаз,
Хайямны да бири джукъгъа санамаз!

Бири чанчад эки кёзню айраннга,
Бири кёзюн улутады тубаннга,..
Сейирдиле хар барысы да манга,
Бир затны уа ангыладым ажымсыз —
Фахму деген болуучанды ышакъсыз,
Джаннга джауду, джууукъсуз не танышсыз!

1986 дж.