Ачы ёлюм келсе къурчну эрите,
«Джазыу!..» — дейбиз, анга атыб айыбны.
Нек билмейди адам улу джюрюте
«Джашау» сууда «Джазыу» деген къайыкъны?

Сослан ташда ёсюб келген терекни
Элия кюч уруб кёсеу этгенча,
Тин хазнасын тазалаучу миллетни
Къыркъ ючюнде кетди, къаргъыш джеттенча.

Болгъан эдик къыркъ юч санны къаргъышда
Айтыр кибик туудукълары Къарчаны.
Тууарыкъмыд, халкъ айтырча алгъышда,
«Ёмюр даугъа» салыр улан орчаны?

Билалмайбыз биз насыбны багъасын,
Термилтебиз суугъа аны тамырын,
Насыб кетсе, билсек аны къайтмазын,
Ол заманда ийнакълайбыз къабырын.

Халкъ джашаса, керти джашы ёлмейди,
Кюндюз болад кюн халкъына, кече — ай.
Бюгюн кимни ашъфгъанъш билмейди
Толусу бла бушуу этген Къарачай!

Джарсыуладан тирилмеген Къарачай...

1982 дж.