1.
Кёлюмдегин тёгелмейме тышыма,
Чыгъанакълы эсе да ол, не гюллю...
Юонню бёркюн кийген кибик башыма,
Сагъышларым къыздыралла бюпонлю.

Чанчылалла ёзендеги тубаннга,
Алтын, кюмюш садакълары джауумну,
Мыйым — тубан, сагъышларым — садакъла,
Тыялмайма садакъ атхан «джаууму».

Тыпырдаугъа кёчсе джюрек сабырлыкъ,
Къан ушайды ёрге ургъан гарагъа,
Табалмайма дарман, сёзсюз джарарыкъ,
Миллетими джюрегинде джарагъа.

2.
Миллетими джюрегинде эм терен
Джарасы уа — билмегени тамалын.
Халкъ тарихден антаула къой, бир черен
Эталмайбыз, зорлукъ джелле амалтын.

Зорлукъ джелде сенек аууз сенекде
Тохтамайды, ол алайды, биз кёкде
Джашамайбыз, джел болмазча, джел болур...
Аллах билим берген алим, ёрге тур!

Таб сен амал, чачмай, тёкмей джелли кюн
Джыяр амал, халкъыбызны тарихин!
Алайсыз а, «Да биз джалгъан миллетбиз,
Джыйымдыкъбыз, андан-мундан келгенбиз!» —

3.
Дей, юренчек болур анга эсибиз.
Бюгюнлюкде, «халкъ» болса да атыбыз,
Бир джаякълаб айтсакъ, болгъан затыбыз —
Эки къауум болуу — миллет шартыбыз!

Ол шартыбыз, миллет сандан айырыб,
Ёлген саннга къошарына ишек джокъ,
Къан джауубуз билеклерин къайырыб
Келмесе да, ол шартыбыз — бизге окъ!

Алим, сени тининг болса уа сокъур,
«Ангыламайд халкъым!» — деб къалса кёлюнг,
Джау алимни илму ишлерин окъур
Бир ёмюрден манкъурт болгъан джаш тёлюнг.

Айтханыма чыртда къалмасын кёлюнг,
Бюпон мийик болса кёзбау ёз тёрюнг,
Къайдагъысын бир джан билмезча ёлюнг,
Хансда батар, ийнан, тамбла кюн кёрюнг.

Аллах сеннге берген эсе уа акъыл,
Бюгюнлюкде джокъ эсе сенден такъыл,
«Уллу алим» атны алыр ючюн тюл,
Атынг джалгъан къралгъа къалыр ючюн тюл,

Миллетинге къалыр ючюн, тюзлюкню
Излеб, табыб, джаз сен, къоркъмай! «Ол джюкню» —
Сыйлы джюкню, батыр джырчы кёлтюрюр,
Джыргъа къошуб, аны халкъгъа ичирир!

Аллах айтса, ол миллетге кюч берир,
Хар таулугъа таулулугъун эсгертир!
(Миллет сезим джюрегинде болгъан халкъ,
Джер сау болуб, ёмюрде да болмаз талкъ!)

4.
Не юретиб кюрешеме мен сеннге?!
Таза ал им, айыб этме сен меннге.
Сенсе, сенсе джарлы халкъгъа къыблама!
Тюненесин билген халкъны окъ, къама...

Тюб этмезин сен билесе менден бек!
Болгъунчугъа халкъынг учхун-гёбелек,
Айт сен тюзюн! Къайдад халкъны тамалы?!
Аллах ючюн, бар эсе бир амалы...

1981 дж.