Болгъан кибик сени кёрген кюнюмде,
Кёз аллыма сыфатынгы келтирсем,
Сен джюзесе къанкъаз халда кёлюмде,
Бу болумдан аязыргъа тебресем,
Кёзлерими къысыб, солуу алмайын,
Сабыр болсанг деген менде умутха,
Акъ къанкъазча, нюрюнг, чырт бой салмайын,
Кёлтюрюлюб ташаяды булутха.

Ойрасы:
Тюнюмде да сен,
Тюшюмде да сен,
Тилейме сенден,
Къайтыб келмезден
Бир кет эсимден —
Акъчепкен!

Кюнден кюннге мен барама тюшюне
Сени кемсиз кереклинге джаныма,
Кетген кече сени кёрдюм тюшюмде,
Акъ кийиниб келген эдинг къатыма...
Булбул джырлаб чайкъай джайны хауасын,
Саугъа этген кибик бизге ауазын,
Кери эдик ол керексиз ёчешден, —
Уянмайын къалгъа эдим ол тюшден!

Ойрасы.

1978 дж.