1.
Къар боягъан бузчукъла
Джауадыла чыкъырдай,
Бирде ушай джангургъа,
Джауадыла кёз алдай.

Терезеден шош къарай,
Тенги ёлген къанкъазлай,
Олтурама джангызлай,
Шош макъамгъа тынгъшай.

Бой сал, — дейди, — тёшекге! —
От юлюшю — кесекле.
Булджуталла кесекге
Къар джугъу буз кесекле.

2.
Сай этелле кёлюмю
Ол быягъы сагъышла...
Кёз аллымда кёрюнюб,
Худжу къалгъан ныгъышла.

Малла ачдан ёкюре,
Итле улуй, бир юре...
Иесиз къалгъан юйле,
Джолда айтыллыкъ кюуле...

Хей, толмагъан муратла!
Бу тауушла, суратла,
Шашдырадыла мени!
Бир джаханим тюрмени

Ичи болгъанча юйюм...
Тууа тургъан бир кюуюм
Сагъышымы сылайды,
Эки кёзюм джылайды,
Джюрегиме джокъ дагъан!

3.
Эшикде уа, къар, не буз,
Не джангур да болмагъан,
Бир зат джауад солуусуз,
Бушуулуду макъамы.
(Чал болгъанды ташлы джол.)
Бир ишексиз, халкъымы
Джыламугъу болур ол...

1983 дж