Рустам, джетдинг сен тенгими джылына,
Шамилъ, джетдинг сен атангы джылына.
Биз сау эсек, олтурабыз джылына,
Шынгкъартчыкъгъа къарай, мыдах ахсына.

«Шимал джели бизге аллын бургъанлы, —
Эки ёмюр, тохтамайды бир кюнде...
Эки джюз джыл миллетибиз тургъанлы
Эки башлы къушну тырнакъ тюбюнде» —

Дейми мыдах сёлешебиз, ахсына,
Шынгкъартчыкъны джукълатмазгъа кюреше —
Ышыкъ бола, отунланы азсына...
Бир кёзюуде джашлыкъдача ёчеше.

Ёлген эсек, джокълайыкъ, — дей, — аланы...
Заман табмай къалсагъыз да къайгъырмаз...
Кёрюбюзню башындагъы хансланы,
Азат аяз сылар, Джуртха келсе джаз.

1994 дж.