Мени Армиягъа ашырыб, ариучукъ,
Энди кесинг элде джашайса,
Тансыкъ болгъанма, кел, деб джазаса да
Джюрегими джауун ашайса.

Тансыкъ болуб къарайма, ариучукъ,
Къарагъанлыгъыма кёрмейме,
Джангыз тырнагъынгы, къаракъашчыгъым,
Сени он къызгъа да бермейле.

Ариучугъум джазгъан заказной письмону
Почтагъа барыб алайым,
Кёкде тургъан айым, джарыкъ тийген кюнюм,
Гоккакёз, джанынга болайым.

Кюндюз эсимден минут да кетмейсе,
Джукъласам тюшюмде кёреме,
Джаз майда чакъгъан ариу гокка хансчыкъ,
Сюймеклик салам береме.

Табулет шахарда джаннган джулдузум,
Тансыкълыкъ салам береме,
Санга ушатыб грузин къызланы
Сени кёзюнгден кёреме.

Эй, ойнай-кюле, тепсей болурса,
«Ильичде» къууанч тойлада,
Ийнарчыкъларымы айта тур, ариучукъ,
Мени да унутуб къойма да.

Мени армиягъа ашырдынг, ариучукъ,
Джаш джюрекчигинг къалтырай,
Мен ташайгъынчы къараб тургъаненг
Бурма чачынгы джел тарай.

Военный билетге тюшген картчыгъымы
Берейим, кёзюмден кёре тур,
Сени кёрмесем мен тёзалмайма,
Сен тюкенле таба келе тур.