Хар заманда мен учунуб озуучу
Заман, менден терк баргъанча кёрюне,
Джашлыгъымда мыллык атыб чабыучу
Кёб затлагъа къымылдайма эрнне.

Заман — алыб къачхан къатыаууз ат,
Башхалыгъы — анда талыу-арыу джокъ,
Акъылман да эталмагъанд анга зат,
Тулпарда да аны тыяр къарыу джокъ.

Гёджеб да тюл, закий да тюл, мен а, мен,
Къайдан болсун аны тыяр мадарым?
«Заман сени атмасын, — деб, -— юсюнден
Къаты къадал!» — дейди бирде къадарым.

Ол мен джетер джолну билмей ахырын,
Къадалама бек заманны атына,
«Ёлюмсюзлюк» дей болурла акъырын
Заман-атны озгъан ишни атына.

Этген ишим джокъ — кёзюме кёрюннген,
Ёлюмсюзлюк сюймей болур тынчлыкъны?..
Сайлар эдим хур джандетни тёрюнден,
Мадар табыб къайтаралсам джашлыкъны.

1997 дж.