1.
Назда джаннган тюрлю-тюрлю чыракъла
Джюрегиме бир джарыкълыкъ бермейле...
Бир тепсейме, бир джырлайма, къоиакъла
Бет къанымда джарсыууму кёрмейле.

Мени кемсиз къоркъутуучу—джангызлыкъ,
Артыкъсыз да бюгюн къолгъа алгъанды.
Джазыу меннге этгенликге къызгъанчлыкъ,
Сыфатынг а кёз аллымда къалгъанды.

Кесим къалдым, кёрюб болмай джазыуну,
Сагъышымдан къамчи этиб айдайма.
Сени атынгы къайтара, кишиуну
Ёшюшоме салыб, башын сылайма.

2.
Къышхы кече ант этгенча кетмезге,
Бурулады тирмен чархча орнунда.
Кёл этерге кюрешсем да кесиме,
Тынчлыкъсызма, джаталмайма орнумда.

Бир кёзюуде туруб, гёзет этеме,
Ол да себеб болмайд мени халыма,
Бир кёзюуде кесиме да кюлеме,
Сабийчикча бу болумсузлугъума.

Танг атханлай, уяллыкъма кесимден,
Бу сагъатда къандырайым кёлюмю,
Не этейим, чыртда кетмейд эсимден
Джангызлыгъым, сакълагъанча ёлюмю.

3.
Кёб сорууну сагъышымда эледим,
Кёз къысмайын чыкъдым энтда тангыма,
Хар сёзюнгю магъанасын джюрегим
Сезгенича ачыкълады ангыма...

Ол кюнледе сюймекликге бёлене,
Джашырмаем джукъну сенден, сен—менден,
Хар халибиз тазалыкъда элене,
Айта эдик келген затны джюрекден.

Эркечигенг, кёлюнгдегин айтаенг:
Юч къамабыз, бир гоккабыз болса—деб,
Къамалагъа сен атла да атаенг,
Кюлсем, ура, гюлге сен ат ата!—деб.

4.
Ийнанмакълыкъ тас болду да бир кюнде,
Тёрт джаныбыз тёрт насыбдан толмады.
Экибизге бир шорбатны тюбюнде
Джашау этер аллай мадар болмады.

Сен билмейсе сюймекликни багъасын!
(Кёбню сюйсенг джашау болад тарыкъсыз)
Ахыр ишинг—джашауунгу заманын
Ашыраса бюпонлюк бла сагъышсыз.

Энди сенден излемейме сюймеклик,
Менде сезим менде къалыр ёмюрге,
Андан сеннге не ауурлукъ, дженгиллик?
Ахыр кере бир тынгыла сёзюме:

5.
Заман озса, бир кюн джолда тюбесек,
Саулукъ, насыб сорсакъ ачыкъ джюрекден,
Сен сорурса тартынсанг да бир кесек,
Ненча насыб буюрду джазыуунг? —деб.

Къаргъамаса, чырмамаса джазыуум,
Эртделеде сен сюйгенча болурма,
Муратымча татлы болса джашауум,
Тёрт джанымдан тёрт насыбдан толурма!..

Тамаданы аты болур Тау-Улан,
Ортанчыны аты болур Тау-Солтан,
Къартлыкъ насыбымы аты—Темирлан,
Андан ары атны джарыкъ айталмам...

Аккыл болуб айтыр къыйын сёзюме,
Ахсынырма, кёзлеринге къарарма,
Джашлыкъдача кёрюнюб сен кёзюме,
Акъырынчыкъ сени атынгы айтырма.

1979 дж.