Саулугъунгда джыр джазама деб санга,
Чамландыргъан этдим болур Аллахны?
Джукълаялмай чыкъдым энтда бир тангнга.
Сёл эталмай джюрегимде палахны.

Мъщах сёзле теджеб хаман кеслерин,
Ауанала болуб, кючлеб ангымы...
Тизгиилени буза, сыза юслерин,
Кёб къагъытны джыртдым, алдым джангыны.

Акъ къагъытым ташлы джолча кёрюне,
Къалтырайды бирде джазгъан къаламым.
Ахыр къагъыт джаздым сени кёрюнге.
Ол дуниягъа барлыкъ кибик саламым.

Хош болалмай, себеб излеб кесиме,
Сагъышымда хур кюнлеге къайтама,
Сеннге айтхан сёзюм тюшюб эсиме,
Энди джансыз суратынга айтама...

Алгъышларым джетмедиле Аллахха,
Болмаса да, кесим билиб, гюнахым.
Амалсызбыз АНДАН келген палахха,
Кеси билед этген ишин Аллахым.

Соруламыд соруу билмей соргъандан?
Къоялмайма чыртда аны джашырыб...
Замансызлай нек кетелле дуниядан,
Къарачайны маджал-маджал джашлары?!

Бек ашыгъыб, кёб тёгюучю нюр — келбет,
Бизни джарыкъ муратыбыз чаре болду.
Къыркъ беш джъшы тюгел толмай, Магомет,
Джулдуз учуб джукъланнганча, тас болду.

Бир къыйынлы миллет кёре эдим биз,
Бир кишиден болмагъанча джагъыбыз...
Бир бушууну унутхунчу эсибиз,
Джангы бирге джолугъады халкъыбыз.

Къутулдукъ! — деб, бюгюн эркин солурла
Ол бек сюйген таулу халкъны джаулары.
Аллахд билген, бушуу эте болурла,
Къарачайны адамы къой, таулары?

Керти кюнде туугъан халкъын джакъларгъа,
Джазыу АНЫ къурч къалача эр этди.
Къолубуздан келмед АНЫ сакъларгъа,
Худжу ауруу лазер отча эритди.

Кёлтюргючю болмагъанлай кишиден,
Тюз джашчыкъдан болгъан эди генерал.
Уллу багъа бергенелле ишине,
Ол кёлю бла къуллукъ этген миллет, кърал.

Бир таукелед, ётгюр эди, керек кюн
Сёзюн артха салмай халкъын сакълагъан.
Къарайбыз да кёралмайбыз биз бюгюн
Фахмуланы, онгсузланы джакълагъан.

«Пайгъамбарды!» — деучен эдик джууукъ, тенг,
Аллах кечсин айтхан эсек терсине...
Пайгъамбаргъа бола башлагъанны тенг
Аллах алыб къоя болур кесине?

Магометни ахыр джолгъа ашырыб,
Къайтдыкъ, алай болур эди джазыуу?
Ол кетсе да бу дуниядан ашыгъыб,
Къалсын эки къызчыгъына джашауу!

Къадар аны алай дженгил алмаса,
Азмед бушуу?! Энди бизге кёл этед:
«Къарачайны арты болуб къалмаса,
Унутулмаз Абрек улу Магомет!»

1997 дж.