Джашауну башлай,
Мен бютюн джашлай,
Камсыклыкъ этдим,
Тутулуб кетдим.

Джашма, къалай джаш...
Тёрт къабыргъа — таш,
Темир эшигим,
Агъач тёшегим.

Огъарыды бек
Терезе кесек,
Элекге ушаш,
Сыйынмазча баш.

Хаман, батса кюн,
Бир акъ кёгюрчюн
Къонады анга,
Сакъ къарай манга.

Чыммакъ кёгюрчюн,
Айт, Аллах ючюн,
Нек къарайса сакъ?
Этейик ушакъ...

Мен да бир инсан
Джазыу къаргъагъан.
Насыблыса сен,
У часа сюйсенг!

Чыммакъ кёгюрчюн,
Кёбдю-кёб кючюнг!
Тыйгъыч джокъ санга!
Бир болуш манга...

Танг атса эсен,
Джуртума уч сен,
Сау эсе анам,
Айт менден салам!

Сауду джашынг-де,
Чалды башы-де,
Бютюн азгъанд-де,
Тансыкъ болгъанд-де!

Чыммакъ кёгюрчюн,
Шо, Аллах ючюн,
Хапарымы айт,
Хапар алыб къайт!

1996 дж.