Суратынгда бу сейирлик бояула,
Джик-джигине синге мени джанымы,
Анда сёзге бла макъамгъа бурула,
Этедиле тамам хар бир санымы.

Мен джырлайма «Джоконда» деб бир джырны,
Джырым салад хар затны да джерине,
Бир кесекчик ашыкъдырад сабырны,
Бек ашыкъгъан атлайд азчыкъ эрине.

Ышарыргъа кюрешеди ачыулу,
Кюлкючю да ышарады джомакълы,
Сюйюм тёгед бет къарамы бек уулу,
Шошуракъча болад бютюн къошакълы.

Леонардо! Суратынгдан туугъан джыр
Насыбымы хур чеклерин кереди!
Джюрекледен джарсыуланы къуугъан джыр,
Хар затха да тамамлыкъны береди!

1979 дж.