Рахат кюнде джыртхыч инсан, ол ачды,
Халкъгъа келген бушуу анга къууанчды.
«Биреу ёлмей, биреу а кюн кёрмейди»,
«Кюн кёргеннге» джазыу насыб бермейди.

Ойрасы:
Табигъатны кёбдю джомакъ ишлери,
Бек тойдуруб, къыркъад джутну тишлерин.

Кечикген джаз. Бошалдыла гебенле,
Малла азыб, кёб болдула ёлгенле.
Бюгюн итни джокъду чыртда хатасы,
Мыллык ашай джылтырайды аркъасы.

Ойрасы.

Азгъан ёгюз итге къараб турады,
Ит да, мыллык ашай, башын бурады:
— Ёгюз, быйыл кёрдюм дуния зауугъун!
Ёгюз уруб бузду итни бауурун.

Ойрасы.

1978 дж.