Джукълаялмай чыкъгъанма тангнга.
Кюн нюрюн теджесе да манга,
Кёзюуде терезем тубаннга
Ушаучанды, къарайма анга.

Ачыуну кесимден букъдуруб,
Кесими къатдырыб мен туруб,
Чынамы терезе тюбюне
Салыб, кёб къарадым тюбюне...

Чапракъла, саргъалгъан чапракъла, —
Джылыугъа кесекге къонакъла,
Башланнганды ахыр айыгъыз,
Къалай терк бошалды джайыгъыз?!

Буруласыз, агъа тёбеннге, —
Забагъа, къумурсха тёбеге...
Боллукълача къабыр къалакъла,
Сиз джатасыз, тюшген чапракъла.

Джайда кёб болсагъыз да, ёзге
Бюгюн кёб кёрюнесиз кёзге,
Сыйынмазча кёлге, сабаннга...
Къоранч кёб кёрюнемид джаннга?!

Джашаугъа кесекге къонакъла —
Терекде саргъалгъан чапракъла,
Бир къайгъы джесирлей эсими,
Мен излейме сизде кесими.

1978 дж.