Эски юйюм, къууанч да,
Жарсыу да кёрдюм сенде.
Жылыуунгу къызгъанмай,
Аямай турдунг менден.

Болду сенде, эски юйюм,
Тоюм да, жиляуум да.
Санга кирип кёрдюле
Шуёхум да, жауум да.

Жауунла да жаудула,
Аладан къорууладынг.
Къарла да кёп тюшдюле,
Къар тюбюнде къоймадынг.

Жер башынгдан ёталмай
Турдула сакъ жауунла.
Сени хорлаялмалла
Боранла, къарла, бузла.

Тыпырынгда олтуруп,
Этдим сагъышларымы.
Аналары да сенде
Ёсдюрдю жашларымы.

От жагъада отунгу
Жылыуун къызгъанмадынг.
Не болса да, эски юйюм,
Туз – гыржынсыз къалмадынг.

Назмуланы мурулдай,
От жагъаннгда олтурдум.
Жолоучугъа, къонакъгъа
Ёз юйю кибик болдунг.

Назмуланы такъгъанма
Сенде, тюзлюкню сюсюп.
Жылыуунгу къызгъанмай,
Жылытдынг, эски юйюм.

1916