Сёзюм сизге, тынгылагъыз,
Айтханымы ангылагъыз,
Сюеме мен жаратсагъыз,-
Зарфха уруп, къаратсагъыз.

Алгъын зорлукъда жашадыкъ,
Ашны ачыу бла ашадыкъ,
Байда жалчы болуп турдукъ,
Анга кёп кере баш урдукъ.

Ата журтубузну юсюн
Басып бушуу, алды кючюн.
Турду къадар заманланы
Бийликлери Романланы.

Ол къарангы кечеледе
Эштиле эд ёксюз жиляу,
Къарангыда кёрюнеед
Бай къолунда къамчи ойнау.

Кёп ёмюр сакъладыкъ кюнню,
Ма жарытып кюн да тийди.
Аны бизге Ленин ийди,-
Кязим къууанч кийим кийди.

Большевикле власть салдыла,
Жашауну эркин кердиле.
Кючлю къарыуну бердиле,
Халкъла насыпны кёрдюле!

Совет власть деген бизбиз,-
Оруслу, грузин, малкъарлы,
Шахтер, сюрюучю эм поэт –
Жангы жашау, жангы адет.

Алгъа айтыр сёзюм олду:
Совет власть ариу жолду,
Хар ишибиз жангы болду,
Дуниябыз тенгликден толду.

Ьу властны ариу кёрейик,
Ахшы болгъанын билейик,
Узакъ саулугъун тилейик,
Аны ючюн биз жан берейик.

Товарищле, сёзюм сизге:
Насыплыкъ туугъанды бизге!
Совет байракъны тюбюнде
Барырбыз биз коммунизмге!

1926-1938