Чегем элни башындан
Кезиусюз буз жаугъанды.
Таш-топуракъ къалмайын
Жаколагъа аугъанды.

Къоншу элле келелле,
Юйюгюзню чачаргъа.
Жако къарыу тапмайды
Къызларын алып къачаргъа.

Чегем бойну къалмайын
Акъ ырхыдан толгъанды.
Он эки жан бир кюннге
Шеит ёлюк болгъанды.

Шеитланы башлары
Сабыр хажи-Малкъарукъ.
Шеитлеге бер, Аллах,
Къыямат кюн бет жарыкъ.

Ташла кибик келелле,
Кёкню кюйсюз бузлары.
Ырхы тюбюнде къалдыла,
Жакону ариу къызлары.

Жазыуу кёкде жазылгъан
Жарлы Аминат-кёз гинжим,
Зарауатха тёзалмай,
Атангдан аман инжилдим.

Къууанч кюнюнгю сакълагъан
Ананг бир аман жиляйды.
Нетейик, тейри чамланса,
Кюйю, палахы былайды.

Жамилат бла Кемилат,
Чачларын тёртен эшелле.
Суу тюбюнден чыгъарып,
Тюймелерин хар ким тешелле.

Жарлы Жако, сен кердюнг
Чегем тарыны кюйсюзюн.
Юч къызынга жапдыла
Аминатны берне кюйюзюн.

Ташла ичинде кёрюнед
Дауутну чепкен кёлеги…
Шафауат жолуна кетди
Аллахны сыйлы мёлеги.

Лячин бала Сюлемен,
Къанаты къатмай жоюлгъан,
Жакоча жазыкъ ким болур,-
Юйю юсюне оюлгъан!

Жарлы эгечи Атин да
Санга къычыра, батады.
Терек кибик къызчыгъы
Къатында ёлюп жатады.

Жарлы Жако, тынчай сен,-
Сабийлей чалгъы тишеген!
Ырхыгъа къарыу этмединг,
Аллахдан себеп излеген.

Холам тарына, Басханнга
Къуугъун атлыла кетдиле.
Чегемни жарлы халкъына
Бу къара кюнле жетдиле.

Сени жауунг къарагъыед,
Чегем бойнунда болгъаннга.
Жакону хапарын айтыгъыз
Къыйынлыкъны соргъаннга.

1912