Кёп жюрюдюм, хакъыйкъатха танышма,
Намысынгы дуния малгъа алышма…
Хыйла ишге, харам мюлкге къатышма,-
Ёлмезлик жокъ, ийман бла къалыгъыз.

Къайдадыла файгъамбарла, игиле,
Жюрютгенле алтын тахла, сюнгюле?
Ауал жетди, бары жерге кирдиле,-
Ёлмезлик жокъ, ийман бла къалыгъыз.

Аллах менме деп сюелди ол Мансур,
Ажашханнга, тоба этип, ким жарсыр?
Кенгде къалыр аллайлагъа нюр Кябсыр,-
Ёлмезлик жокъ, ийман бла къалыгъыз.

Жашау кюнюн таш да, суу да тауусур,
Тауда кийик, тюзде тюе ауушур,
Кязим хажи ууаз беред, сёзю – сур,-
Ёлмезлик жокъ, ийман бла къалыгъыз.

Оюлурла юйле, бийик къалала,
Къуу болурла таула, жашил талала,
Шаудан суула къургъакъ ташдан толурла,-
Ёлмезлик жокъ, ийман бла къалыгъыз.

Топуракъдан жаратылдыкъ, топуракъ
Болур бизге тёшек, жастыкъ, опуракъ,
Керек бизге къуран, китап окъумакъ,-
Ёлмезлик жокъ, ийман бла къалыгъыз.

Кючю, жауу кетер эки кёзюнгю,
Хыйсабы аз, учуз болур сёзюнгю,
Эл кенгешге чакъырмазла ёзюнгю,-
Ёлмезлик жокъ, ийман бла къалыгъыз.

Женгсиз кёлек кийдирирле, тенг кесип,
Агъач атха миндирирле, терк жетип,
Къабыр дууа билдирирле эскертип,-
Ёлмезлик жокъ, ийман бла къалыгъыз.

Сын ташынгы сары ташдан салырла,
Къабырынга, жаназынга барырла,
Сен кетерсе, таула, тюзле къалырла,-
Ёлмезлик жокъ, ийман бла къалыгъыз.

Жарсымагъыз, игиликни билген аз,
Аны ючюн дерт тутаргъа жарамаз,
Себеп берген къайтырына къарамаз,-
Ёлмезлик жокъ, ийман бла къалыгъыз.

1935