|
Кязим Мечиев - Этгенле - Бегиев Абдуллах эм башхала. |
Бу дунияда сакъ болайыкъ намазгъа,
Къыямат кюн жаханимге бармазгъа.
Бек тутайыкъ оразаны, рекятны –
Къыямат кюн сен табарса хар затны.
Ойлашмасанг бу дунияны халындан,–
Кёзюнг тоймаз бу дунияны малындан.
Чархынг къоркъмаз жаханимни отундан,
Айланырса, шайтан сюрюп артынгдан.
Аллах, мени сен иймандан айырма,
Мен жарлыны – дин исламдан айырма...
Топурагъынг басар мени санымы,
Кяфырлыкъгъа къыйнап алыр жанымы.
Атам, анам билмез анда халымы,
Къара жилян ичер анда къанымы.
Гюняхланы тар къабырда жетдирир,
Намазланы къызгъан темирде этдирир.
Хар намазын къатлап-къатлап тёлетир,
Ургъан сайын мен жарлыны кюл этер.
Кёрмеймисе адамланы кетгенин,
Къолларына не зат алып элтгенин?
Муслийманла, ийман жолгъа къайтайыкъ,
Тоба этип, «Аллах, Аллах» айтайыкъ.
|