Башланды огъурсуз уруш,
Къайгъылыды къырал-къуруш,
Акъылда болалла буруш,
Къалай болур энди туруш?

Немец бизге къажау болду,
Чегибизге сауут бурду,
Бизге берген сёзюн бузду,
Асыры мардадан озду.

Къоншу къырыллагъа барып,
Урушмазгъа деп къол салып,
Онгсуз къырылланы алып,
Бизге айланды, ёшюн салып.

Гитлер чапды жерибизге,
Къайгъы келди элибизге.
Партияны хорларла деп,
Ол келмесин кёлюгюзге.

Биз жашайбыз бек къыйналып,
Битеу кючюбюзню салып,
Къыралланы арасында
Энчи къыйынлыкъла алып.

Кюйдюреди шахарланы,
Саулай союп адамланы,
Зыраф этди кёп малланы,
Ким унутур бу халланы?

Къатынланы эрсиз этди,
Сабийлени ёксюз этди,
Халкъгъа къыйынлыкълагъа жетди,
Къаллай заманыбыз кетди!

Душман огъурсуз болса да,
Халкъны къырып бошаялмаз,
Ол оноуну кенг салса да,
Муратына жетишалмаз.

Бузулур деп сиз къоркъмагъыз
Совет халкъны къурч къаласы,
Атасын фашист ёлтюрсе,
Унутмаз аны баласы.

Гитлер чапды жолун билмей,
Анга келир кюнню сезмей.
Аны ахырын тюз билебиз,
Иши къалыр затха тиймей.

Тохташыр бу къаты уруш,
Оноу салыр совет къуруш,
Болмаз анда акъыл буруш,
Болурбуз биз сора тыныш.

Совет властны алалмазла,
Байрагъын малтаялмазла.
Бир жумдурукъ болурбуз биз,
Бизден кючлю болалмазла.

Артха къуууп биз барырбыз,
Къызыл байракъ биз салырбыз.
Ала зырафлыкъ салсала,
Къаныбызны биз алырбыз.

Къоркъуп артха душман кетсин,
Жерни бизге эркин этсин,
Чекде тургъан Къызыл Аскер
Толу муратына жетсин.

Аскерле, алгъа барыгъыз,
Душманнга заран салыгъыз.
Къаныгъызны ьолу алыгъыз,
Темирден болсун жаныгъыз!

Алгъышлайбыз партияны,
Биз аскерни алгъышлайыкъ.
Совет халкъны фашистлеге
Малтатмаз деп ийнанайыкъ!

1941