1
Бисмиллях деп башлайыкъ,
Салат-салам айтайыкъ.
Адетде кюнде жетмиш
Биз тобагъа къайтайыкъ.

Биринчиси – бек алгъын
Бисмилляхны окъуюкъ.
Бисмилляхсыз иш этсек –
Ибилисге жол къойдукъ.

Экинчиси – кишини,
Сёгюп, сёзюн этмезге,
Дуниядан жёнгер алмай,
Жолубузгъа кетмезге.

Жёнгерибиз ол болур –
Къуран, келям окъусакъ,
Ибадетде жюрюсек,
Уллу Аллахдан къоркъсакъ.

Ючюнчюсю – кишиге
Зарлыкъ, зорлукъ этмезге, –
Дуниядан жёнгер алмай,
Жолубузгъа кетмезге.

Жёнгерибиз ол болур –
Оразаны биз тутсакъ,
Къыйыныбыз оу болур –
Харам, халал унутсакъ.

Беш намазны къылайыкъ,
Озуп не артха къалмайыкъ,
Ёле туруп, жёнгерге
Ибилисни алмайыкъ.

Бир сагъатны ичиндеди
Ууахтыны келиую,
Сексен минг жыл азапды
Бир намазны тёлеую.

Жетиди жаханимле,
Сегиздиле жаннетле,
Ахыратха айланыгъыз
Хар заман да, юмметле.

Халалдан мал жыйсагъыз,
Хыйсап жууап берирсиз.
Харамдан мал жыйсагъыз,
Ауур азап кёрюрсюз.

Артыкъ хайыр келмейди
Дуния малны кёбюнден,
Жюрюп къалай ётерсиз
Къылдан инчге кёпюрден?

Дуния ючюн талашып,
Хыйла сюрюп кюрешдик.
Андан хайыр чыкъмады,
Аллах айтды, биз эштдик:

«Тилигизни тыйыгъыз,
Жалгъан айтмай, тил этмей,
Нафсыгъызны тыйыгъыз,
Аман жолгъа юйретмей.

Зекят, фитир беригиз,
Жарлылагъа жарагъыз.
Кёкден, жерден эс этип,
Айгъа, Кюннге къарагъыз.

Бир заманда жокъ эдинг,
Туудунг, ёсдюнг, жаш болдунг.
Ёлюрюнге ийнандынг –
Адамладан баш болдунг.

Кече болса, Аллахха
Шукур этип жатыгъыз.
Бек сыйлы файгъамбаргъа
Салат-салам айтыгъыз».

Къуран бла билдирди
Ахыратны халларын,
Уллу Аллах кечиучюдю
Тоба этген къулларын.

Узакъ жолгъа къуралдыкъ –
Азыкъ алмай кетмейик.
Болжалы къысха болур,
Узакъ умут этмейик.

Башыгъызны буругъуз, –
Кёзюнг харам кёргенлей,
Бушууунгдан файда жокъ,
Азырайыл келгенлей.

Жанынгы тартып башлар
Аякъладан, жиликден.
Кёкюрекден, билекден,
Башынгдагъы тюкледен.

Жанар, кюер жюрегинг,
Ананг билмез халынгдан.
Тюк тенгли файда болмаз
Адамынгдан, малынгдан.

Сёлешалмай, сёз эштмей,
Тутмай къалыр санларынг.
Кёзлеринге кёрюнюр
Ахыратны жоллары.

Олсагъат шайтан жетер
Имманынгы алыргъа.
Кесича кяфыр этер, –
Жаханимге салыргъа.

Гитчеликден саныгъыз
Ибадетде алышсын.
Уллу Аллах ийман берсин,
Жан ауалда болушсун.

Кече-кюн да этебиз
Гюнах бла кабахат,
Аллах бизге жиберсин
Расулундан шафагъат.

Татлы жанынг терк жукълар,
Къуруп къалыр санларынг,
Мереслеге чачылыр
Жыйып тургъан малларынг.

Дуниялыкъдан тоймайбыз,
Къарт болсакъ да, сюербиз,
Бир кюн бир, билмей туруп,
Акъ кебинин киербиз.

Акъ кебинни болмайды
Этеклери-женглери.
Къанга юсюнде жууарла
Къарындашы, тенглери.

Санларынгы жууаргъа
Сапын, къумгъан алырла.
Жамауат бла элтип,
Къара жерге салырла.

Жер тюбюнде жатарса,
Дуния жарыкъ кёрмезсе,
Къарт ананг жиляй къалыр,
Артха къайтып келмезсе.

Соруучула келирле,
«Дининг нед?» – деп сорурла.
Жууабын бералмасанг,
Токъмакъ бла урурла.

Оюмсуз тепсемегиз,
Къызла бла уланла:
Тар къабырда къыйнарла
Акъырапла, жилянла.

Жиляй, сарнай къобарла
Бейнамазла къабырдан.
Жаханим акъырапла
Уллу болуп къадырдан.

Гюнахлыла бетлери –
Бир биринден сюйюмсюз,
Къабырладан къобарла,
Къымыжалай, кийимсиз.

Арасатха барырла,
Къырау тартып кёзлери.
Къоркъгъандан чыкъмай къалыр
Факъырланы сёзлери.

Забанийле келирле,
Ассыланы кёрюрле,
От къамичиле бла
Жаханимге сюрюрле.

Кийдирирле юслерине
Къатырандан кёлекле,
Къолларында къамичи, –
Азап этген тилекле.

Къайнар суула къуярла,
Жанар, кюер санлары,
Сексенжыллыкъ азапда
Чыкъмай турур жанлары.

Ассылагъа хазырды
Жаханимни къуюсу, –
Табанындан бир тутса,
Къайнап башлар мыйысы.

Кеч билип сокъураныр,
Бу дуниядан кёчгенлей.
Чегиси дуккулланыр,
Хамим сууун ичгенлей.

Тюе бойну кибикди
Жаханимде жилянла.
Урса, ачыуу кетмез, –
Тамам минг жыл жилярла.

Кюн биширип кюйдюрюр
Азаплыла терисин.
Къыркъ минг кяфырны силдер
Забанийни бириси.

Мукъмин къулла арасатха
Атлы болуп барырла.
Аны кёрген ассыла
Сейирсинип къалырла.

Къауум-къауум барырла,
Толгъан айча жарытып,
Ибадетни ахшылыгъын
Ассылагъа танытып.

Бал шербетле ичерле,
Салкъынлагъа олтуруп,
Файгъамбарны юмметлери
Тёгерегин толтуруп.

Соруу-сууал кёрмезле
Гюнахлары силинип,
Жаннетлеге барырла,
Сууаплары билинип.

2
Муслийманлар, айтама:
Зикир болсун сёзюбюз.
Мен Аллахдан тилейме –
Жаннет кёрсюн кёзюбюз.

Эй-хей, миллер, тилейме;
Намаз этмей жатмазгъа,
Къылмай къоюп намазны,
Гюнахлагъа батмазгъа.

Барыбызгъа борч болду
Намаз шартын билирге.
Намаз шартын билмейин –
Гюнахлагъа кирирге.

Эй-хей, миллер, тилейме:
Кече намаз къылыргъа.
Эрикмейин, талмайын,
Шартын билип турургъа.

Этмесек да андан артыкъ,
Беш намазны этейик.
Тюз жоллагъа тюзелип,
Ийман бла кетейик.

Жаннет деген – сыйлы зат,
Гюнахлы ары баралмаз.
Ол жаннетге барыргъа
Намаз къылмай жарамаз.

Бу дунияны затлары
Барысы да къалырла.
Намаз къоймай этгенле –
Нюр жаннетге барырла.

Намазын къоймай этген –
Азапха зат тутулмаз;
Бир намазы къалса да,
Ол азапсыз къутулмаз.

Эй-хей, миллер, тилейме:
Салауатла салыргъа,
Беш намазны къылыргъа
Жамауатха барыргъа.

Муслийманла, тилейме
Бу сёзлени унутмазгъа,
Бу сёзлени унутуп,
Терс жолланы тутмазгъа.

Муслийманла, тюзелип,
Тюз жоллагъа барайыкъ,
Жаханимни отундан
Узакъ болуп къалайыкъ.

Ётюрюкню айтыргъа
Бир мукъминнге жарамаз.
Ётюрюкню къоймасанг,
Ийман санга къарамаз.

Ётюрюкню къоймагъан –
Ахшылыкъны алалмаз,
Ётюрюкню къошмайын,
Терс жоллагъа баралмаз.

Терс жоллагъа да барып,
Аякъ тутмай жыгъылсанг,
Ажалынг жетип, жанынг
Тамагъынга тыгъылса.

Бир жерден мадар чыкъмаз
Ёлюм жолун тыяргъа...
Сыйлы Аллахдан тилейбиз
Жаннетлеге жыяргъа.

Ёлюм деген – керти зат,
Билмей туруп жетеди.
Ёлюр ауруу тийгеннге,
Анга ким да не этеди?

Бир къауумну умуту –
Жашлай мен да ёлмем деп.
Уллу кёллю болмасын,
Бу затланы кёрмем деп.

Бу сёзлени да эштип,
Жюрегинге алгъанда,
Биз а нечик болурбуз,
Тар къабыргъа баргъанда?

Ийман-ислам билейик,
Бизден заман кетгинчи,
Тоба этип къояйыкъ,
Ёлюм къоркъуу жетгинчи.

Кёп затланы кёрюрсе
Кесинг жангыз къалгъанда.
Не жууапны берирсе,
Мункир, Накир баргъанда?

Мункир, Накир дегенинг
Тар къабырда жолугъур,
Ол къабырны ичинде
Санга соруу сорулур.

Ислам динни сен тутсанг,
Жууап берип болурса.
Динни тутмай сен барсанг,
Хайран болуп турурса.

Бир да намаз этмесенг,
Кёпмюд малынг, жулурча?
Кёп малланы да къоюп,
Жер тюбюнде турурча?

Тар къабыргъа киргенде,
Ишни халын билирсе.
Беш намазынг дегенни
Ол заманда кёрюрсе.

Кёп жерледе айтама
Беш намазны халындан,
Бизге файда жокъду да
Бу дунияны малындан.

Бу сёзлени айтама,
Жюрегимден къыйналып.
Намаз шартын билейик,
Гитчеликден ийнанып.

Намаз борчду, адамла,
Акъылбалыкъ болгъаннга.
Аллах жаннетни берсин
Сёзлерими алгъаннга.

Жаннети да хазырды
Намаз этип тургъаннга,
Жаханим да хазырды
Намазсыз къутулгъаннга.

Дуния бизни алдамай,
Мудах болсун кёлюбюз.
Аллах бизни тюзетип,
Жаннет болсун жолубуз.

Кёп айтдынг, Кязим факъыр,
Жюрегинг да бек такъыр.
Хар мукъминни, я Аллах,
Жаннетинге сен чакъыр.