«Ёлмесенг да, къартдамы
Болмазса?» – делле нартла.
Бу сёзню айтыучу эдиле
Бизге мубарик къартла.

Къартлыкъ бизге келеди,
Биз жукъ билмей тургъанлай,
Эшигими къакъгъанын
Билдим, акъ тюк ургъанлай.

Ёлмесегиз, балала,
Сиз да болурсуз бизлей.
Жашлыкъ къутулуп кетер,
Къалдым мен да аны кюсей.

Балам, жаш кюнлеринги
Юйде олтуруп бошама.
Жахил къалып дунияда,
Хайыуаннга ушама.

Не мазаллы болсанг да,
Жахил къалсанг –жокъ файда!
Хайыуанча жегилип,
Сен жюрюрсе хар къайда.

Дунияда сыйлылыкъны
Сюйген болсанг – окъурса.
Жашлыгъынгдан билимсиз
Къалсанг – таза сокъурса.

Тагъылма сен билимсиз,
Къылыкъсыз балалагъа.
Ала бла жюрюсенг,
Сен да ушарса алагъа.

Эй, балала, салмагъыз
Иги ишни болжалгъа!
Сиз ашыгъып этигиз
Иги ишни бек алгъа.

Илмугъузгъа тюз акъыл
Керти нёгер болмаса,
Сабырлыкъ, дабийгъат да
Юсюгюзде толмаса,

Не кёп окъусагъыз да,
Сиз насыплы болмазсыз.
Ариу къылыкълы болмай,
Дагъыда сиз онгмазсыз.

Халкъгъа кесин сюйдюрмек –
Бек багъалыд, билигиз.
Ариу къылыкълы болуп,
Татлы болсун тилигиз.

Муслийманла сюйгенни
Бир Аллах да сюеди.
Ала шагъат болгъанны
Жаннетине иеди.

Сиз туракълап турмагъыз
Сизге келлик акълыкъгъа,
Болжал салмай, къайтыгъыз
Бу мен айтхан хакълыкъгъа.

Махтау бары – Аллахдад,
Бизни Адамдан туудургъан.
Илму, акъыл да берип,
Кирибизни жуудургъан.

Салат-саламла болсун
Мухаммат расулуна,
Аллахдан рахмат жаусун
Анга ийнаннган къулуна.