|
Ёзденланы Альберт - Чолпан. |
«Кимни арбасына минсенг,
Аны джырын джырла» — деб, сен
Кюрешсенг да, джырламазма,
Ол болумда баралмазма!..
Эркинликни джолун сайлай,
Кесим этген джырны джырлай,
Къыл къобузну алыб къолгъа,
Атланырма узакъ джолгъа.
Мен ат этиб макъамладан,
Арба этиб назмуладан,
Себеб бола арыгъаннга,
Эжиу этиб джырлагъаннга,
Мен сый бере бабалагъа,
Саугъа бере балалагъа,
Джолум — алгъа! Джол джокъ артха,
Миннгинчиме «агъач атха»!
Кёб джерлеге да барырма,
Тюйюшледен да арырма,
Мен кесимча джол салырма,
Халкъны ауузунда къалырма.
Къыл къобузум, «арбам», «атым»,
Сабийлеге — аманатым!
Андан насыб меннге къайда,
Джыр джырланса Къарачайда?!
1979 дж.
|