|
Ёзденланы Альберт - Чолпан. |
Ёксюз къалгъан къозучукъ
Ары-бери чабады,
Эмчек излей, къойлагъа
Кёзюу мыллык атады.
Къатларына къоймайла,
Хыны этиб кетелле,
Такъыр джанны джашаудан
Тюнгюлюрча этелле.
Чаба-чаба арыса,
Джыламукъла тёгеди,
Къалкъый келиб, тюшюнде
Ол анасын кёреди.
Таш джанында макъырыб,
Ийнакълайды анасы,
Къуйрукъчугъун ойнатыб,
Ма эмеди баласы...
Уянса уа — джукъ да джокъ,
Хуна ташны джалайды,
Къара бурма сыртчыгъын
Аяз сылай джырлайды:
О, джылама, анангы
Сау этерге джокъ мадар,
Аллах айтса, джанынгы
Сакълаб турлукъду къадар!
Аллах айтыб, тюзелсенг,
Онглу джан болурса сен!
Ол заманда джууукъ, тенг
Сюелмезле сенден кенг!
1975 дж.
|