Пелиуан Алауган къая дорбунда жашайды,
Ой, алай жашайды,
Апсатыны кийик малларын, кесини маллары кибик, ашайды,
Ой, алай ашайды.
Алауган батыр, анасындан тулпар туугъанды,
Ой, алай туугъанды,
Доммай сюрюулени, ызларындан болуп, къуугъанды,
Ой, алай къуугъанды,
5 Аягъындан сермеп, мазаллы доммайны буугъанды,
Ой, алай буугъанды.
Алып келеди, сауутсуз-сабасыз ёлтюрюп,
Ой, алай ёлтюрюп,
Доммай мыллыкны саулай аркъасына кётюрюп,
Ой, алай кётюрюп.
Ол садакъ окъну да бир шашдырмайын атады,
Ой, алай атады,
Тийген жеринде белине дери батады,
Ой, алай батады.
10 Арсланны тутуп, къыркъыллыкъ къойлай, байлайды,
Ой, алай байлайды,
Тереклени юзюп а, зыкала кибик, сайлайды,
Ой, алай сайлайды.
Къаплан териледен тонла тикдирип, кийгенди,
Ой, алай кийгенди,
Эмеген къатынын а ол бек залим сюйгенди,
Ой, алай сюйгенди.
Союм ёгюзню эти анга ушхууургъа жетмейди,
Ой, алай жетмейди,
15 Уку кёзлери кече сууда тюкню кёрелле,
Ой, алай кёрелле,
Аны къолундан кёп жаныуарла ёлелле,
Ой, алай ёлелле,
Къаяны оюп, баргъан сууну аллын тыяды,
Ой, алай тыяды,
Анда чабакъланы къол аязына жыяды,
Ой, алай жыяды.
Узун сакъалы аны кёкюрегин жабады,
Ой, алай жабады,
20 Кийиклени ызындан ол атдан женгил чабады,
Ой, алай чабады.
Чынар тереклени, кырдыкла кибик эзеди,
Ой, алай эзеди,
Кийик сюрюулени жыйыларындан сезеди,
Ой, алай сезеди.
Ой, аллай нарт улуду тулпар Алауган,
Сен чючгюрсенг, къаяла таула тебелле,
Ой, алай тебелле,
25 Аны эшитселе, эмегенле, къоркъуп, жерге чёгелле,
Ой, алай чёгелле.
Къар ысхындыкла, юзюлюп, энишге агъалла,
Ой, алай агъалла,
Халкъ сени юсюнгден жырла, жомакъла тагъалла,
Ой, алай тагъалла.
Эмегеннге тюбеп, атыш-тутуш болгъанса,
Ой, алай болгъанса.
Сен аны хорлап, къатынын, сыйырып, алгъанса,
Ой, алай алгъанса.
30 Ол а санга тамаша улан тапханды,
Ой, алай тапханды,
Алай эмеген къатын жашынгы къапханды,
Ой, алай къапханды.
Душманым тюбесин ол Алауганны аллына,
Ой, алай аллына,
Аллай кюн келсин сюймсгениме, къанлыма,
Ой, алай къанлыма.
Алауган жылайды, тауну-ташны таралтып,
Ой, алай таралтып,
35 Эмеген къатынын сокъгъанды, къабыргъаларын къаралтып,
Ой, алай къаралтып.
Алауган а тюп болурма деп къоркъады,
Ой, алай къеркъады,
Жыламукълары узун сакъалындан саркъады,
Ой, алай саркъады.