Айджаякъ, ала джаулугъунг
Ариу джарашады бойнунга.
Мен сукъланама, ёлеме
Мамукъдан джумушакъ къойнунга.
Ой джылкъы анасы акъ байтал,
Ол къарышкъулакъ тай табар,
Тейри, сени анангы мен таный эдим,
Ол къалгъан къатынладан байхамбар.
Ой, джылкъылада хора тай,
Салчы аягъынгы тузакъгъа.
Манга эки къанат битгеед
Айджаякъны алыб кетерге узакъгъа.
Ойра, тузакъ дейле къоймайла
Къанджыгъамда джибек аркъаннга,
Сора хора дейдиле да къоймайла
Кесим миниучю тарпаннга.
Ой тарпан тайла ойнайла,
Ала ойнагъандан тоймайла,
Сени ананг манга сормай берлигед,
Къалгъан сюймегенле къоймайла.
Ойра, джылкъылада къашха тай,
Аягъын салмайды тузакъгъа.
Бу тюзелген ишни нек ийдинг
Бош тилле бла узакъгъа.
Тулгъа барлыкъ сен болсанг,
Санга менден игини ким табар,
Иги тулгъа бармай къалгъан къатын
Артда бушуу этиб джер къабар.
Ой, джылкъы анасы акъ байтал
Ол сакъат болду, рахын.
Ойра, мен сюйгенлей сюймесенг,
Сени болсун мени гюнахым.
Дагъыда джылкъы анасы акъ байтал,
Ёлмей джаны джазгъа сау чыкъса,
Къарышкъулакъ, ариу тай табар.
Саулай дуниягъа айлансам,
Сенден ариу манга къайда бар?
Айджаякъ болур бизни кюн таякъ,
Сени къутас кибик чачларынг,
Джылкъыланы айдарыкъдыла, билеме,
Айджаякъ, сени джашларынг.
Тарасанг да таракъ кирмейди,
Айджаякъ сени къутас чачынга,
Тейри, джылкъыладан атлыкъ берирме
Сени абадан джашынга.
Биз урум халкъда джашайбыз.
Ишлегенибиз кёмюрд, кюлд,
Бу джашау бизге джашау тюлд.
Кел биз Тебердиге барайыкъ,
Джашарбыз, печи бла кёк баш юй салыб.
Башыбызгъа уллу кюн салыб.
Ойра, кёкге басхыч салгъанма
Кёкде булутланы чачаргъа,
Ой, манга эки къа,нат битгеед,
Айджаякъ, сени алыб къачаргъа.
Мен таралама, ёлеме,
Санга къайнайды сарыуум,
Сени мындан алыб къачаргъа,
Джетмейди мени къарыуум.
Ой, Багъыр улу, къурурукъ,
Къаллай хоралагъа минеди,
Къара кёрпе тонла киеди,
Эрсиз къатынланы сюеди.
Багъыр улу Къасбот деген кюлаякъ,
Къабыргъалада болур, джаным, чын аякъ
Къабыргъадан тюшюб, аякъ уалсын
Шахар Тебердини суу алсын.

Ойра, тауда отлагъан кийикле,
Ала джукъламайла сойланмай,
Мен сени алай алыб къоялмам,
Иги сагыш этиб ойланмай.
Туура болумунгу мен айтсам,
Айджаягъым, ариу акъ джаулукъ,
Къалмагъанды энди сени юсюнгде
Керти алгъын кибик махтаулукъ.