Тейри онгарсын,
Тейри джалбарсын,
Онг айландырсын,
Онг джюрютсюн,
Игиликни бери этсин,
Дманлыкъны кери этсин,
Кесибиз сюйген кибик тейри этсин.
Келген келин насыблы болсун.
Ырызлы болсун,
Бутун буруб олтурсун
Бутлай урчукъ толтурсун.
Ышара келсин, кюле келсин,
Этер ишин биле келсин,
Келген джерин сюе келсин.
Эм алгъын таракъчы табсын,
Ызы бла таякъчы табсын.
Таракъчысы таракъ тутсун.
Таякъчысы таякъ тутсун,
Игиликни бери этсин,
Аманлыкъны кери этсин.
къойну тюклюсюн берсин,
Ийнекни сютлюсюн берсин.
Игилик кетмесин,
Къаргъыш джетмесин.
Аман киши айтханча болмасын,
Этилген алгъыш къабыл болсун,
Бизни сюймегенни юйю дауур болсун.
Сюйгенибиз сюйюнсюн,
Ариу кийинсин.
Алгъыш къабыл болсун,
Дуниябыз мамыр болсун,
Ырысхыбыз уллу болсун,
Терен болсун,
Таммий-кёл кибик,
Кёкден джаугъан джауум кибик,
Джерден чыкъгъан кырдык кибик,
- Келген келинчикни джиби кибик,
Кесилген къурманлыкъны тюгю кибик.
Эшикге чыгъыб, джамчы ургъан,
Атха миниб къамчи ургъан
Балалары болсунла.
Токъ санлы толу аякъ!
Тилибизге салайыкъ,
Ичине къарайыкъ —
Къуругъан чёбню башыды,
Бу бозады, бозады,
Ашхы киши муну ичерге базады.
Ач къарынны токъ этген,
Аманлыкъны джокъ этген,
Бек битсинле сабанла,
Ашамасынла аманла.
Башларына къарыш джетмесин,
Тюблеринден джылан ётмесин,
Бу эки адамны кеслери сюйген кибик,
Тейри этсин.
Этген муратларын табсынла,
Бир-бирин джаратсынла,
Бу суу бла мюрзеу
Бир-бирлерине джарашхан кибик,
Алай джарашсынла,
Алгъышчыла алгъыш этсинле,
Аминчиле амин десинле.