Ой долай, долай, май долай!
Ой долай, былай джау гыбыт,
Ийнекле келелле, черкес джылкъылай,
Эчкиле келелле акъгъан чырпылай.
Бузугъу болмагъан сау гыбыт.
Муну айранындан джауу кёб,
Муну бузугъундан сауу кёб.
Ой сенден гоббан майла алырбыз,
Тамаданы аллына салырбыз.
Тамадабыз къош-къош тигим къабдырыр,
Мени айтханына дженгил чабдырыр,
Айтханына дженгил чабмасам,
Бутларыма сайры чыбыкъны тартдырыр.
Ой долай, былай май долай!
Бизни юйюбюзге хан къонакъла келдиле,
Ой джаным, сени сакълай-сакълай ёлдюле.
Ой, бола эсенг, бол гыбыт!
Болмай эсенг, сени бучхагъынгы тешелле,
Мени да къулагъымы кеселле,
Экисин да бир-бирине тагъарла,
Тюблеринден отну къызыу джагъарла.
Джел уруб тыкъыр-мыкъыр этдирсин.
Сюрюучюлеге иги юлюш джетдирсин.
Ой долай, былай былкъылда,
Мен айтайым долайны сарынын,
Болмай эсенг, бурулсун сени гыбышы къарынынг.
Муну ичиндеги къара ийнекни майыды,
Муну тышындагъы сары эчкини гыбыты.
Ой долай, долай, май долай!
Ой, къакъыракъда къаз ойнар,
Къамишде турна къычырыр,
Ой, улан къызгъа ычхыныр,
Ой, улан ойнар, къыз кюлюр,
Экисини ичиндегин ким билир?
Аны бешикдеги сабий, джаш билир.
Ой къакъыракъда эки къаз,
Бири ала, бири боз,
Аласын къой да бозун ал,
Анасына къараб къызын ал.
Анасыны сыры къызында,
Атасыны сыры улунда.
Атагъа ашхы улан гууса,
Ол къула тюзде бау этер,
Аны ичи толу мал этер,
Дуниягъа ойлашыб кар этер.
Атагъа джаман улан тууса,
Атасындан къалгъан кёб малны
Ол карыклагъа санатыр,
Кесини тёббе кекелин
Къатынлагъа таратыр.
Сюрюучюге аман юй бийче
Джаз джатсын да кюз турсун,
Андан сора сюрюучюге тюз турсун.
Малчысына аман юй бийчени
Амандан болсун ёлюмю,
Эбзе кендир болсун аны кебини.
Ой, сюрюучюге иги юй бийчени,
Табанына тирелсин мизере джаулугъу,
Иги болсун сюйгенини саулугъу.
Аны чач бауу табанына тирелсин,
Тёгерегинден къаракъаш келинле сюелсин.
Игиден болсун аны ёмюрю,
Чий дарийден болсун аны кебини.